Wednesday, 6 January 2016

كوچمن لر ايچون( پناهنده لر ايچون)/ معصومه قربانى

كوچمن لر ايچون(پناهنده لر ايچون)

بو دوغرودور كى اينسان اينتحار ائليْيه نده،سئوديخلريندن اينتقام آلير.اينسان اينتحار ائلير اونا گوره كى سئوديخلريندن ايسته ديغى ماراغى آلابيلمير و يا اونلارين سئوگى سينه امين دئيل.او سيلاحى قويور كافاسينا و دئيير:من بونان آرتيق محبته لياقتيم واريدى،ايندى سيزه گوستره رم كى من سيزليغ نه قدر چتين دير.او شبهه ده دير ،شبهه ده ياشامق هاساد دييل او شبهه دن قورتولماق ايستير پس ماشانى چكير!او فانى دونيادان تكرار دونوب عزيزلرينين اونسوزلوخدان درد و كدرين حيس ائتمك لرين گورمك ايستير.اينتحار سئوگى دن قايناخلانير،پارادوكس بوردا كى اينسان نه قدر اوزونو سئويرسه او قدر اينتحارا ميلى آرتيرار.
اما اينسان نده ن كوچور؟اينسان كوچور چون ياشاماق ايستير،كوچمك ده سئوگى دن گلير و كوچمك ده ده اينتقام عنصرو گوجلودور.سئوگى و اينتقام اينتحاردان -كوچمك ده عئينى عونصور اولسادا اما بويوك فرقلى ليك لرى وار.اينسان اوزاقلارا كوچور چون سئوديخلرينين درد و كدرين گورمك ايستمير،چونكى اونلارين سئوگى سيندن امين دير.اينسان كوچور چونكو ايستمير سئوديخلرى اونون درد و كدرين گورمك له كدرلَنسينلر.اما او كوچور چونكو اوزون دن اينتقام آلماق ايستير،اينتحار اوزگه دن اينتقام آلماق ايستمك دير و كوچمك اوزوندَن .

گونلرين آرخاسيندا-بير گونش سيز صاباح يوخودان قاليب و دئيرسن:بو توپراقلاردان گئتمَك ايستيرم،بير گونشلى دنيز قوخولو بير يئره گئتمَك ايستيرم.اما بو بير آرزودور،بير آرزو كى قارانليقدا و كولگه ده ياشيان هر كس اونا چاتماق آرزوسولا ياشايير.دنيز قيراغيندا گونشلى و تميز هاوالاردا ياشاماق اينسانين ايتيرديغى اتوپيا شهردير.خيالاردا اولسادا هر گون اوردا مِح له نيريخ !اما بير گون ياتيب و همن قان تَرين ايچينده يوخودان آيْيليرسان و تيكرار ياتيب و آيْيليرسان،تر و أورك چيرپينما سنى بوغماق ايستير سانكى،آرتيق نفس چكَميرم بورالاردا.چانتامى باغلاييب و گئده جه يم بو صاباح.بدنين تيتره يير و گوزوندن بير دامجى ياش گلير دوشونورسن كى نجور ياشاياجاغام ائلسيز-وطنسيز.او طـراوتلى و ديلين بيلمه ديغين بير يئرده نه لر سنى گوزلويور؟بير عومور آزادليغا ساواشديم بونان سورادا بير پارچا چورك ايچون ساواشاجايام،نه اولورسا اولسون مچيدلرين و كيليسالارين چورك سيرا لاريندا سيرامى گوزله يه جه يم،رستوران لاردا قاب يوياجايام و كئبيرلى باخيش لارى اوز ايچيمده اَريده جه يم،اوزوم دن اينتقام آلاجايام!بير گون دونه جه يم وطنه،او زامان كى گونش ايشيغى گوزلرى قاماشديرير-او زامان كى دنيزلر سوي نان دولو اولا و دنيزده چيميب اونون قومساليخ لاريندا اوزومو گونشه وئره بيلم،بو توپراقلارا بير گون اَلى دولو دونه جه يم.

بير صاباحين گونشسيز ايشيغيندا چانتامى چينيمه آلديم سانكى اطلس يئر كوره سين چئنينه آلان كيمى و سئوديخلريمدن آيريلماق ايسته ديم!هر كس دن قوجاخلاشيب و اپوشورسن،هر كس تسلى وئرير كى بو آيريليق اوزون سورمز و تيكرار دونه جخسن وطنه و سن تصديق ائليرسن.سون اولاراق آنانلا اوپوشوپ وداع لاشماليسان،قوجاخلاشما اوزون سورور.گوزلرينين ياشينا حاكيم اولا بيلمير و قارغايير اونلارى كى سنين گئتمه غينه سبب اولوبلار.آرابا سنى گوزله يير،آرتيق آيريليرسان .آرابايا مينيب و سون اولاراق شيشه داليندان سئوديخلرينه باخماق ايستيرسن،آرابا حركت ائلير و سن گوز ياشلارينى كيمسه گورمه سين دييه باشينى آشاغى يا ساليرسان.بيردن بيرى نه گوجو وار شوشه يه چالير،باش قُوْزاييرسان -باخيرسان كى آنان دير،تك أودر كى دالينجا قاچيب تيكرار سنن اوپوشوپ و قوجاخلاشماق ايستير.آنلار اولادلارى دوغوب لار،اونلار اوزوموز اينانديغيميز يالانلارى بئله بيليرلر.او سنين يالانلارنى دوغرولاريندان بلكه چوخ سِئوير.اينسان اوزونه يالان دئيب يالادا بيلر اما آنايا يالان دئيب  آلادماق اولماز.او بيلير دونمك يالاندير او بيلير كى داها دونمويه جَخسن او بيلير كى غوربتده جنازه ن ده غريبليغ چكه جخ.سون اولاراق آنالا قوجاخلاشما چوخ چتيندير و او ثانيه ده بير تازا حيات باشلايير.اورادان غوربت باشلايير،اورادان بيليرسن كى داها دونمويه جخسن بو توپراقلارا !آيريلماقى و كوچمه غى آنلاماق ايچون او لحضه نى او ثانيه نى آنلاماق لازيم دير او لحظه كى ايكينجى سئرى آنانلا اوپوشدون،او لحظه كى آنلادين داها بو توپراقلارا دونمه يه جخسن،او ثانيه كى باشينى قؤوْزاديين-بير اَليندن گوز ياشينى و او بيرى اَليندن اَلينى توولادين سئوديخلرينه.او بير يا ايكى ثانيه نى آنلاماق لازيم دير،او ايكى ثانيه ده كى سن ده و سئوديخلرينده درد و كدر دن آغلاماق ايستيرديز اما بير بيره تسلى اولسون هر كس گولدو.او ثانيه لرى هئچ كيمسه دوغرو دوزگون آچيقلاياماز اونو ياشاماق لازيمدى!او آندان كى آنليرسان بو سون گوروش دو،او آندا كى شخصى اوزون دونه جه يم دئديغيني يالان اولدوغون آنلاييرسان.باشينى شيشه آرخاسيندان دالى دوندريب و آرخاندا سَپيلميش سويا باخديغيندا زامانين دورماسين ايستيرسن.ايچرى دن بير آه چكيرسن و اوز ايچينده دوشونورسن كى نئجه بو تورپاق لاردا دويون قارين دولانا بيلمديم،نئجه سئوديخلريمى دويونجاخ گورمه ديم و باخماغا باشليرسان!تانيديغين هر آغاجين و هر كوچه باشيندان كئچنده گوزلرينى اونا زيليريرسن،سانكى اورادا بير شئى ايتيريب سن و يا بير شى آختاريرسان،قيزيل كيمى بير شى و يا آغاج و هر كوچه باشيندا بلكه بير الماس كيمى بير شى آختاريرسان -بلكه ده اونان دا دَيْرلى(ارزيشلى)خاطيره كيمى بير شى ،كئچميشلرين خاطيره سى،ايلك سئوديغين اوغلانى يا قيزى بو كوچه ده و بو آغاجين كولگه سينده گوردون.دوداخلارينا گتيره بيلمه ديغين سئوگى لرى-اوز ايچينده ساخلاديغين سئوگى لرى.بو شهرين هر يئرى سنه بير خاطيره -بونان بئله خاطيره لردن ياشياجاخسان و حتى اوزونده خاطيره لره قووشاجاخسان.
گونشلى و گول قوخولو توپراقلارا يئتيرمه ايچون چانتانى چئنينه آليرسان سانكى وطنى چئنينده دولانديران كيمين و اوزونو دنيزه تاپشيريرسان.نه اولسا دنيزلر آلاهى اوفكه لى اولسادا عاديلدير،او سئوديخلرين سئچيب و اوز درين سونسوزلوغوندا قوناق ساخلار.كئچمك ايچون او ماليات آلار،ايلك اولوم قورخوسو اوردا سنين جانين دا اوتورار.گَمى يه ميننده اوزاخداكى گونشه باخير سان  و اوز اوزنه دئيرسن نه اولاردى بونلارين هاميسى بير رويا كيمى اولاردى نه اولاردى بو رويا دا بيريسى قولوننان ياپيشيب و دييردى : نه اولور گئتمه!دوشونورسن كى نه اولاردى آنان أورك سوزون دئيردى: دئيردى كى گئتمه غوربت او قدر وطن حسرتى چكه جخسن كى جنازه نده  اوردا داريخاجاخ .و سن غم يوكون گوجسوز چئينلرينده دولانديريرسان و يولونا دوام ائليرسن.او زامان كى قيريخ گمى يه اوفكه لى دنيز قيرباج كيمى شه په لرين وورار ،اوردان غوربت ده اولمك قورخوسو سنين جانينا اوتورار.دنيزدن كئچسن ده بو قورخو عومور بويو سنن ال چكمز.بير عومور وطنده دولاندين و گزدين ايندى اونو چئنلرينده بير سوچ  كيمى دولانديريرسان،بير عومور آزادليغا ساواشدين-ايندى بير پارچا چورك ايچون موجاديله وئريرسن.بير عومور اولومه ميدان اوخودون-ايندى هر آخشام ياتاندا اولوم قورخوسوندان ياتاميرسان.غوربتده  اولمك چتين دير،قورخورسان كى جسدين ده داريخا بو توپراقلاردا.كوچمنى آنلاماق چوخ چتين دوستلار،اونو آنلاماق ايچون اونو ياشاماق گركدير.اونون اورگينده كى غمى بير آناسى بيلر،اونون چانتاسى غم چانتاسى دير.پارادوكس بوردا كى اونون سئوگى سى سئوديخلرينه او قدر درين دير كى هئچ زامان دردلرينى آچيب و پايلاشماز.اونون دردى آنلاماغا گره ك او سون گوروشونو ،او سون آنى كى باشين قوزادى و آرخاسيندا سه پيلن سويا باخدى او سون آنى آنلاماق لازيم دير.اونون غمين آنلاماق ايچون اونون سئوگى سين آنلاماق لازيم دير.

معصومه قربانى

No comments:

Post a Comment